Aaj zara ghar jaldi aa jana,
Suna hai desh mein lockdown laga hai.
Jaanta hun ki chunaav ka waqt hai,
Har koi apni rally karne mein juta hai.
Par tum apni dukaan na kholna,
Kyunki desh mein lockdown laga hai.
Jis raaste par ajtak sadak na bani,
Aaj waha sarkar ne dhero tv lagaye hai.
Corona hua to kya hua,
Aapke neta ji tv par to aye hain.
Train band hai aur bus bhi ruki hai,
Par tumhen to bas gaon jane ki padi hai.
Ho bhi kyu na,
Bhukhe pet mein aag jo lagi hai.
Par zara baat ko samjho,
Tum mehaz desh ki tarakki ka ek zariya ho,
Desh nahi.
Ye bade bade bade jahaaz aur helicopter,
Tumpe nazar rakhne ke liye hain,
Tumhe bethane ke liye nahin.
Par ghabrana mat mere dost,
Ese mushkil waqt mein hi koi.
Maseeha bankar ayega,
Jinko ghar tak na pahunchaya kisi ne,
Unhe koi ‘Sonu Sood’ pahunchayega.
Yahi khoobi hai mere bharat ki,
Jisko karna chahiye wo karta nahi.
Aur jis mein ho zara bhi insaniyat,
Wo madad karne se pichhe hatt ta nahi.
Shayad yahi wajah hai ki,
Itni dikkaton ke baad bhi.
Ye desh kabhi rukta nahi,
Ye desh kabhi marta nahi.